Contos en galego para a rapazada

Para estes días nos que nos toca quedar na casa, moitos son os recursos que circulan polas redes para axudarnos a pasar mellor as horas coas nenas e nenos.

Hoxe queremos compartir con vós a oferta de Kalandraka tv.

Na súa páxina ofrécennos cada día un conto narrado en galego. Unha boa idea para ofrecerlle á rapazada cultura de calidade en galego.

Desexamos que lle saquedes moito proveito.

Ánimo para todas e todos!

#EuQuedoNaCasa

Hoxe aproveitamos e agradecemos a imaxe do grande Leandro Lamas para lembrármonos que por responsabilidade, por solidariedade, por precaución..., durante o estado de alarma decretado polos gobernos central e autonómico debemos ficar na casa.

Durante este tempo, o profesorado enviará propostas e material para seguir traballando na casa. Estade atentas e atentos á Plataforma, ás aulas virtuais de Classroom, ás redes sociais...

Desde o EDLG tamén achegaremos recursos e propostas para levarmos mellor estes días.

Moito ánimo! 

Todo vai ir ben!

Xuntos podemos con todo!

XII Xornadas da Lingua: Eu falo, ti podes, inténtao!

Unha ampla oferta de actividades que comezan a principios de marzo e algunhas chegaran até finais de xuño.

PARA TODO O COLEXIO

· Ambientación de aulas, corredores, patios e portería.

· Bos días radiofónicos e de televisión escolar interna do 2 ao 6 de marzo.

EDUCACIÓN INFANTIL

· “A mochila viaxeira” libros en galego que van de casa en casa para lelos en familia.

· “Conto colectivo” os máis maiores de EI crearan entre todos un conto.

EDUCACIÓN PRIMARIA

· “O conto viaxeiro da educación viaria” para 1º e 2º.

EDUCACIÓN SECUNDARIA

· Titorías de sensibilización sobre o galego con xogo en liña “O Preguntoiro”.

EP, ESO E BAC.

· “Achegamento a Xeración Nós” a través das clases de Lingua Galega

EI, EP, ESO E BAC.

· Exposición  “A Xeración Nós, vista por nós”

NOS RECREOS

· Exposición e venta dos materiais “normalizadores (EDLG, Amencer, Ozoco)

· ”Recreos vivos en Educación Primaria: Cantamos os temas de Uxía Lambona e a banda molona, Guadi, galeoke...

· “Posadoiro”: gústame o galego porque... cada quen completa a frase e tira unha foto.

· Proxecto televisión en galego: Gravar vídeos co alumnado que o desexe contando chistes, por que falar en galego, contar un conto...

PARA TODA A COMUNIDAD EDUCATIVA

* Encontros con... Afonso Vázquez Monxardín, escritor e experto en historia, lingua e investigación, co relatorio “Un tempo, unha xente, unha revista... Nós”.

* I Concurso de fotografía “Gustas do galego?”

* XXI Concurso de Hipercurtos contos.

* Baleirado da enquisa ... por que non falas galego de cotío no cole?

* Presentación dunha nova edición de textos de AA. AA. recollidos polo EDLG no Centenario.

* Reparto de materiais didácticos entre o profesorado de E. Infantil Educación Primaria, ESO e Bacharelato.

NA CONTORNA

· Contaxiar o uso da lingua galega tamén no ámbito empresarial, comercial … a través das familias do centro:

o   Pegada de carteis “Mellor dito” nos establecementos de Ourense.

o   Pegada de carteis “Nós atendemos en galego” nos establecementos de Ourense.

· Dar a coñecer aos medios de comunicación e as familias do noso alumando o que se está a realizar en prol da lingua e cultura galega nestas xornadas e durante todo o curso.

Achegamento á Xeración Nós desde as clases de Lingua galega

Dentro do marco das XII Xornadas da Lingua, desde o EDLG promovemos o achegamento á Xeración Nós no ano do seu bicentenario. Desta volta farase desde as clases de Lingua galega.

Aquí podedes ver unha das propostas nas que traballou o alumnado.

Encontros con...

Dentro das XII Xornadas da Lingua en Salesianos Ourense organizadas polo Equipo de Dinamización da Lingua Galega (EDLG) participamos no “Encontro con… Afonso Vázquez Monxardín”, que tivo lugar o martes 3 de marzo de 17:45 a 19h. na Aula Magna do colexio. 

Compartiu connosco o relatorio “Un tempo, unha xente, unha revista... Nós”. Este acto está aberto á participación e asistencia de toda a comunidade educativa do colexio salesiano (profesorado, PAS, familias e alumnado), así como á cidadanía en xeral (ata completar aforo), pois é un acto público dentro das Xornadas.

Presentación das XII Xornadas da Lingua

O EDLG, Equipo de Dinamización de Lingua Galega do colexio salesiano presentou aos medios de comunicación en rolda de prensa o luns 2 de marzo ás 11:15h na Aula Magna de Salesianos as  XII XORNADAS DA LINGUA co lema  “Eu falo, ti podes. Inténtao!”. 

Estiveron presentes no acto Mª José Cabaleiro e Xulio C. Iglesias, membros do EDLG de Salesianos. 

O obxectivo destas xornadas é realizar unha campaña de sensibilización, aprecio e posta en valor da lingua galega entre o alumnado de EI, EP, ESO e Bac., profesorado, PAS e familias do noso centro.

XI Xornadas da Lingua: "Encontros con... Manuel Núñez Singala"

Manuel Núñez Singala, director do Servizo de Normalización Lingüística da Universidade de Santiago de Compostela, volve visitar o noso colexio nas Xornadas da Lingua.

Desta volta non falará dos prexuízos lingüísticos, senón da lingua galega como oportunidade.

A súa visita enmárcase dentro da actividade "Encontros con..." e está dirixida principalmente ao profesorado (como claustro formativo), pero tamén está aberta á participación das familias, do alumnado de bacharelato e de quen desexe achegarse.

Así que, xa sabedes, o martes 12 de marzo ás 17:45h. tedes unha cita na Aula Magna do colexio para aprender algo máis sobre as oportunidades que nos ofrece a nosa lingua.

XI Xornadas da lingua en Salesianos Ourense

Un ano máis (e xa van 11!) o EDLG do colexio organiza as Xornadas da Lingua para promover o uso do galego.

Haberá moitas actividades nas que poderemos participar. Desde EI ata Bacharelato. Alumnado, profesorado, PAS e familias. Formais e informais. Para xente de Salesianos e tamén abertas á cidade...

Animádevos a participar!

E xa sabedes cal é o noso lema: "Eu falo. Ti podes. Inténtao!".

Viva o Entroido!

Personificación do Entroido no cadro de Pieter Bruegel o Vello A guerra do Entroido e a Coresma. Kunsthistorische Museum. Viena

Coñeces as expresións "vestir como un entroido" e "estar como un entroido"? 

E o refrán "Martes de entroido e día de Pascua, cada larpeiro na súa casa"?

Aínda que en diversos puntos da provincia xa comenzaron a festexar o Entroido, no noso cole comezamos esta semana, cos mandados do meco e coas festas de disfraces por seccións.

Con motivo da celebración desta festa popular, aproveitamos para presentarvos un recurso que de seguro vos ha de ser moi útil para coñecer máis e mellor a lingua galega. Trátase do Portal das Palabras, unha iniciativa impulsada pola Real Academia Galega (RAG) e a Fundación Barrié. Conta con diferentes seccións nas que se dan a coñecer diferentes aspectos do léxico galego: Palabra do día, Setestrelo, Xogos, Mira que din... Na sección "Allos con bugallos" poderás atopar información sobre as expresións e refráns referidos ao Entroido coas que abrimos esta entrada no blog.

Tal e como aparece recollido no sitio web, "o Seminario de Lexicografía da RAG é o responsable de que cada semana se publiquen novos contidos, ben sexan xogos, vídeos, curiosidades léxicas, recursos ou novas. Todos os días propoñerase unha nova palabra da que recibiremos información sobre o seu significado, etimoloxía e outras referencias. Para estar ao tanto de todas as novidades é ben pasarse diariamente por estas páxinas ou estar conectado aos nosos espazos de Facebook e Twitter".

Xa sabes, se queres coñecer mellor este portal e saber máis do léxico galego, preme na ligazón incluída máis arriba ou bótalle unha ollada ao vídeo de presentación da súa web. Seguro que unha vez que o coñezas volverás a el en moitas máis ocasións.

24 de febreiro, Día de Rosalía

O 24 de febreiro son moitos os colectivos que organizan diferentes actividades por todo o país para conmemorar a data de nacemento de Rosalía de Castro, muller que significou e significa moito para Galicia, para o galego, para as mulleres...

Destacamos estas tres que terán lugar en Ourense:

#LibreOMeuPensamento_rdc_19

* Domingo 24 ás 13h. na Praza Maior: Acto cultural organizado polo Grupo RosaLauria.

* Domingo 24 ás 18h. no Auditorio Municipal: "Rosalía pequeniña. Concerto". Será un espectáculo familiar gratuíto no que música e poesía van da man na voz de Uxía Senlle na Sala Principal. 

Nesta ligazón poderedes atopar máis información.

Para quen aínda non coñezades o libro-CD, aquí vos deixamos un vídeo para empezar a celebralo...

* Luns 25, de 11:30h. a 12:30h., no Salón de Plenos da Deputación de Ourense: Celebración do Día de Rosalía organizado pola Coordinadora de Escolas Católicas de Ourense. Durante este acto, unha representación de alumnas e alumnos de Carmelitas, Franciscanas, Salesianos e Xosefinas lerán e interpretarán poemas da escritora.

Se vós tamén queredes festexar este día, compartide textos, fotos, etc. co cancelo 

#LibreOMeuPensamento_rdc_19 

Feliz Día de Rosalía 2019!

Seguimos preparándonos para comezar con forza as X Xornadas da Lingua: "Escolle non escoller".

Aquí vai o segundo vídeo (do que falabamos nunha entrada anterior) para poñernos en contexto de cara á celebración das X Xornadas da Lingua que comezamos o luns 5 de marzo.

Desta volta escollimos unha charla de Manuel Núñez Singala (sociolingüista, escritor, director do Servizo de Normalización Lingüística da Universidade de Santiago de Compostela...). 

Algunhas persoas tivemos ocasión de escoitalo xa falar do tema nas nosas Xornadas da Lingua no cole; desta volta deixámosvos a súa intervención no LGx15 impulsado pola Coordinadora de Traballadores/as de Normalización da Lingua (CTNL) para que tamén vós coñezades a súa proposta: "Escolle non escoller".

Boa fin de semana!

Webserie galega e en galego: "Galicia Crime"

O próximo sábado 3 de marzo, celebrarase a XVI Edición dos Premios Mestre Mateo organizada pola Academia Galega do Audiovisual (AGA).

Coñécense quen son finalistas, pero para saber a quen se lles entrega desta volta os premios da Academia haberá que agardar ata a fin de semana.

Seguramente poidamos coñecer o que se está facendo no eido audiovisual galego. É importante coñecer para valorar.

Hoxe queremos compartir con vós a nosa descuberta da edición pasada: a web serie galega e en galego "Galicia Crime", "ambientada nos Concellos Unidos de Galicia, unha terra que mestura bica con pancakes, muñeiras con country, o enxebre co cool. Un lugar no que calquera soño é posible, a terra das oportunidades e o marisco". 

As risas están aseguradas.

Dádeslle unha oportunidade!

No vídeo vai o 1º capítulo da Temporada 1. Nesta ligazón, o acceso á súa páxina web para que poidades botarlle unha ollada ao proxecto, aos demais capítulos, ao caderno de produción...

Pioneiras. Galegas que abriron camiño.

"Unha das primeiras correspondentes de guerra foi galega, tamén unha das primeiras navegantes, escritoras ou directoras dun xornal. Este libro fala de doce mulleres que conseguiron vencer as barreiras impostas ao seu xénero e dar os primeiros pasos por vieiros transitados ata ese momento só por homes. Mulleres reais e diversas que no seu día foron pioneiras en diferentes ámbitos e cuxas historias merecen ser coñecidas e postas en valor."

Así presenta Xerais esta obra na súa páxina web.

O próximo luns 5 de marzo comezaremos no colexio as X Xornadas da Lingua. Nesta edición o alumnado traballará o tema da muller desde a clase de Inglés, relacionando as Xornadas coa celebración do Día da Muller o 8 de marzo. A través desta actividade coñecerán mulleres galegas que fixeron historia, dun xeito ou outro. 

Poderedes seguir as novas en imaxes a través das redes sociais do colexio.

Bo día, acougo

Como ben sabedes, no colexio estamos traballando o tema das emocións en todas as etapas educativas.

Hoxe deixámosvos unha recomendación para traballar coas vosas fillas e fillos "exercicios de relaxación con palabras e movementos": Bo día, acougo, un libro de Anne Crahay publicado por Tambre (Edelvives) en 2017.

Desexamos que vos axude a compartir con elas e eles momentos especiais e que aprendan a xestionar as emocións de maneira positiva.

Hoxe, 24 de febeiro, celebramos o Día de Rosalía, 181 anos despois do nacemento da autora.

No colexio celebrámolo onte, sumándonos así á iniciativa promovida pola Asociación de Escritoras e Escritores en Lingua Galega (AELG). #AbrideAFiestra

En EP escribiron cartas a Rosalía e fixeron fotos co rostro da escritora simbolizando que "todas e todos somos Rosalía".

En ESO-Bac. saímos á fachada do colexio para escoitar temas musicais baseados nos poemas de Rosalía, ler o manifesto escrito por María Reimóndez para a AELG e ler algúns poemas. Estivemos presentes neste xesto escolar os vogais de Normalización Lingüística de cada aula e o alumnado de "º Bac. B, acompañados por profesorado do EDLG.

Podedes ver fotografías nas redes sociais do colexio, tanto no Facebook como no Twitter.

Desde o EDLG convidámosvos a celebrar este día tamén nas familias con estas recomendacións:

- Para que as nenas e nenos coñezan a obra de Rosalía, podedes botar man da publicación de Galaxia na súa colección Sonárbore (libros-CD): Rosalía pequeniña. 

-  Para as mozas e mozos, recomendamos esta lista de reprodución de YouTube na que poderedes atopar os poemas rosalianos a ritmo de rap, rock...

- Para o público adulto que queira coñecer un pouco máis a fondo a emblemática figura de Rosalía de Castro, recomendamos a biografía escrita por María Xesús Lama, Rosalía de Castro. Cantos de independencia e liberdade (1837-1863), publicado tamén por Galaxia.

Desexamos que todas e todos descubramos en Rosalía un referente de esperanza que nos leve a sentírmonos orgullosos da nosa lingua, a nosa terra, a nosa cultura e traballemos cada día por darlles un futuro de esperanza.

Deixamos aquí un tema de Xardín Desordenado baseado nun escrito de Carlos Casares (autor homenaxeado no Día das Letras Galegas en 2017) dedicado a Rosalía para celebrar este día. 

Feliz Día de Rosalía!

Volve Youtubeir@s!

Este ano imos ter a oportunidade de encher a rede de contidos en galego.

Calquera pode participar. Os "únicos" requisitos que teñen que cumprir os vídeos que se presenten ao certame son:

• Axeitarse ás categorías de vídeo-facermos ou vídeo-opinarmos.
• Estar en galego.
• Non superar os 5 minutos de duración.
• Fican expresamente excluídos das propostas os traballos de índole comercial ou publicitaria e aqueles vídeos que promovan unha mensaxe violenta, denigrante ou ofensiva.

Nesta edición, como novidade, tamén se pode participar propoñendo vídeos xa feitos por outras persoas e/ou votando os vídeos que máis gusten.

Quen se anima?

O ano pasado pasámolo moi ben na gala de entrega de premios; haberá que repetir, ou que?

Máis información nesta ligazón. 

"Escribindo o futuro". Encontros con...

Compartides con nós a honra e o privilexio de charlar con Diego Ameixeiras, María Canosa, Francisco Castro e Carlos Vila Sexto?

Este martes, 7 de marzo ás 17:45h. na Aula Magna do colexio.

Ao rematar seguiremos cun encontro informal na Sala Aberta, degustando os doces que se presenten ao II Concurso de doces tradicionais galegos.

Agardámosvos!

Encontros con...

Carlos Caneiro visita o noso cole

No marco das VI Xornadas da Lingua, o martes 8 de abril, ás 18:15 h. terá lugar un encontro co escritor galego e antigo alumno do centro Xosé Carlos Caneiro.

O acto está aberto a alumnos e familias, e consistirá nun encontro informal co escritor a partir da exposición dun tema na Aula Magna do colexio.

Estades todas e todos convidados!

VI XORNADAS DA LINGUA

VI XORNADAS DA LINGUA

Xa están aquí as VI Xornadas da Língua, que todos os anos organiza o EDLG con unha manchea de actividades para toda a comunidade educativa. Ahí vos queda o cartel con todas as cousas das que podedes ser partícipes ..... Ánimo e participade!!!!

Tríptico das VI Xornadas da Lingua

Bases do concurso "Buscamos nome, lema e logo para o EDLG"

Bases do concurso "Remedios medicinais naturais"

 

Boletín informativo de Auria Coordinadora ENDL Ourense

Boletín nº 1

Nesta publicación atoparás información sobre a lingua e tamén sobre outras cuestións relacionadas coa escola.