Gálix

Se hai uns días vos comentabamos que podiades acceder aos fondos dixitais das bibliotecas públicas de Galicia a través da plataforma GaliciaLe, e tamén o concurso "un poema na túa voz", hoxe deixámosvos unha información interesante para sacarlle máis partido a ese fondo de libros en galego: Gálix, a Asociación galega do libro infantil e xuvenil.

A través do seu blog e dos seus perfís nas redes sociais levan a cabo un labor de promoción e visibilización da cultura e da lingua galegas a través da literatura infantil e xuvenil.

Non perdades a ocasión de seguir as súas recomendacións!

Proposta para as vacacións: Un poema na túa voz.

E chegaron as vacacións de Semana Santa...

Imos deixar atrás as rutinas escolares desde a casa e aproveitar os días para facermos na casa todas esas cousas para as que habitualmente non temos tempo.

Por se nestes días vos apetece, deixámosvos unha proposta de Gálix para encher de poesía os vosos días e regalárllela a todo o mundo: o Concurso "Un poema na túa voz"

Vai destinado a nenas e nenos de 6 a 14 anos e consiste en gravar un poema en galego e envialo ao concurso. Se vos animades a participar, bulide, o prazo remata o 10 de abril e podedes facelo desde a casa!

Aquí vos deixamos unha ligazón á información máis completa e ás bases do concurso.