Apaixoados polo tempo libre: IEF

Na inauguración deste novo curso gozamos en Primaria da presentación das actividades extraescolares dos grupos de tempo libre que se dinamizan desde a Asociación Xuvenil Amencer.

Mediante o xogo e diversas dinámicas contáronnos que fan, cando se xuntan, por que é unha boa idea participar neles, como se poden anotar... 

Tendo a Saltimbanquis que se xuntas os venres logo do cole, Andaina e ADS os sábados pola mañá. 

Un xeito de gozar e aprender no tempo libre e como non onde tamén ten cabida o GALEGO

COMEZAMOS EN 3, 2, 1 ...

Comezamos un novo curso cheo de novas oportunidades pero sen perder de vista a realidade que seguimos a vivir!

Este será o lema que nos acompañe ao longo deste novo curso. Arredor del xirarán todas as propostas educativo-pastorais nas que participaremos.

Benvidos ao curso 2021 - 2022!

A VIVIR CON PAIXÓN ESTE NOVO CURSO

Fin de curso.

 Aínda que para o alumnado as clases remataron o 22, o profesorado continuou traballando ata o día 30 para pechar ata setembro este curso tan diferente, intenso e complexo.

Grazas ao alumnado, ás familias, ao profesorado e a todo o PAS porque sen a complicidade e o esforzo de todos non sería posible rematar sen incidentes salientables este curso.

Tivemos o noso claustro de despedida e marchamos de vacacións ata setembro.

Aínda que Salesianos segue aberto durante o verán con actividades de tempo libre xestionadas desde a Asociación Xuvenil Amencer.

Bo verán e felices vacacións.

Vémonos en setembro!

Visitas culturais e excursións.

A normalización da situación provocada pola COVID permitiunos volver un pouco á normalidade e puidemos participar nas actividades que todos os cursos realizamos fóra das aulas no 3º trimestre, aproveitando o bo tempo.

Visitas culturais e excursións a San Cibrao de Las, Silleda, Padrón, Castrelo de Miño... 

Oportunidades para gozar da natureza, coñecer a riqueza da nosa terra, participar en actividades de ocio, escoitar a fala das xentes doutros lugares.

Adaptadas e seguindo os protocolos, pero unha vez máis sen renunciarmos a elas.

Máis información e fotos nas RRSS do colexio.

Festas de María Auxiliadora

Se xaneiro en Salesianos é sinónimo de festa, maio tamén o é coa lembranza á Virxe Auxiliadora.

Non foron unhas festas como as doutros anos, pero seguimos celebrando, que é o importante.

Coma sempre, moitas e diversas actividades para festexar: concursos, bailes, xogos, deportes, celebracións relixiosas, despedida do alumnado de 2º de Bacharelato...

Máis info e fotos nas RRSS do colexio.

Proxecto de innovación: Interioridade. Xuntanza do equipo.

Detrás das propostas para traballar a Interioridade no colexio hai un equipo de persoas que traballa en rede con outras educadoras e educadores que fan o mesmo noutros colexios salesianos de Galicia (A Coruña, Lugo, Cambados, Vigo).

A pandemia mudou as xuntanzas presenciais por xuntanzas telemáticas, pero a ilusión e a motivación mantéñense.

Benvido, maio!

 No noso cole dámoslle a benvida a este mes elaborando maios, colocando maias no cole e nas casas e visitando o maio de Amencer ao ritmo das coplas, seguindo a tradición.

Celebración pascual.

Fieis á nosa identidade cristiá, tivemos a finais do 2º trimestre as celebracións da reconciliación en ESO-Bac. e tamén unha celebración en clave pascual en EP celebrando a boa nova de que Xesús resucitou!

Campaña de Axuda a Países Empobrecidos (APE)

 No 3º trimestre a campaña solidaria vai dirixida a proxectos desenvolvidos en países empobrecidos.

Traballámolo nas titorías e tamén nos comprometemos coa nosa achega económica para facer posible que outras persoas poidan vivir un pouco mellor.

Convivencias en ESO-Bac.

Outros anos iamos a Allariz, faciamos o Camiño de Santiago, camiñabamos ata o Santuario dos Milagres... Este ano a pandemia non nos permitíu facelo así, pero tampouco renunciamos a ter polo menos unha xornada de convivencia para compartir experiencias, coñecérmonos mellor...

E así comezamos o 3º trimestre, convivindo.

"O charco de Ulises", representación do Centro Dramático Galego.

 E se nós non podemos ir ao teatro, o teatro vén a nós.

O Centro Dramático Galego convidou os centros educativos a participar nunha adaptación da súa última produción: O charco de Ulises, unha relectura do clásico relacionada coa migración de galegos e galegas a América no século pasado.

A través da pantalla non é o mesmo, pero é un xeito de non renunciar á cultura e de descubrir tamén novas propostas culturais que non animen a gozar delas en directo nos teatros. Ademais desta volta puidemos conversar co director do CDG e tamén coas persoas que dirixiron a posta en escena!

Visita telemática á exposición "De Nós a nós".

Por mor da COVID non puidemos visitala en grupo no Centro Cultural Marcos Valcárcel (aínda que si puidemos facelo persoalmente coas amizades e a familia), pero tiñamos que aproveitar as visitas telemáticas para poder aprender máis da Xeración Nós a través desta exposición.

Persoas, datos curiosos, contidos, proxección, ideas modernas... Unha sorte poder participar aínda que fose de xeito telemático!

E se no 1920 un grupo de persoas foi quen de lograr poñer Galicia e o galego no eixo do panorama cultural, que non poderemos facer nós no século XXI cos recursos e ferramentas que temos...