Aí vén o maio...

Compartimos con vós esta publicación e este vídeo musical do Consello da Cultura Galega para celebrar este día e a festividade deste tempo:

"O maio" é un dos poemas máis coñecidos de Curros Enríquez no que o poeta invoca unha primavera de liberdade e xustiza. Neste Primeiro de Maio tan diferente, o Consello da Cultura Galega (CCG) vén de xuntar nun proxecto celebrativo este poema reivindicativo de Curros coas novas voces da música galega. O resultado é un vídeo musical que mestura rumba con influencias da música tropical para dar a benvida ao mes de maio e, de paso, celebrar a vida cun alento solidario. Haberá mil primaveras máis!

100 novas cancións en Radio Picariña

A CRTVG vén de anunciar que acaban de engadir 100 cancións máis á lista de reprodución de Radio Picariña.

Xa vos presentaramos este recurso, pero deixámosvolo aquí novamente para que poidades botar man del tamén durante este periodo de confinamento doméstico.

É unha maneira divertida de que as/os máis peques da casa aprendan galego tamén a través da música.

24 de febreiro, Día de Rosalía

O 24 de febreiro son moitos os colectivos que organizan diferentes actividades por todo o país para conmemorar a data de nacemento de Rosalía de Castro, muller que significou e significa moito para Galicia, para o galego, para as mulleres...

Destacamos estas tres que terán lugar en Ourense:

#LibreOMeuPensamento_rdc_19

* Domingo 24 ás 13h. na Praza Maior: Acto cultural organizado polo Grupo RosaLauria.

* Domingo 24 ás 18h. no Auditorio Municipal: "Rosalía pequeniña. Concerto". Será un espectáculo familiar gratuíto no que música e poesía van da man na voz de Uxía Senlle na Sala Principal. 

Nesta ligazón poderedes atopar máis información.

Para quen aínda non coñezades o libro-CD, aquí vos deixamos un vídeo para empezar a celebralo...

* Luns 25, de 11:30h. a 12:30h., no Salón de Plenos da Deputación de Ourense: Celebración do Día de Rosalía organizado pola Coordinadora de Escolas Católicas de Ourense. Durante este acto, unha representación de alumnas e alumnos de Carmelitas, Franciscanas, Salesianos e Xosefinas lerán e interpretarán poemas da escritora.

Se vós tamén queredes festexar este día, compartide textos, fotos, etc. co cancelo 

#LibreOMeuPensamento_rdc_19 

Feliz Día de Rosalía 2019!

Nova tempada do Proxecto APEGO

O pasado 14 de setembro volveu ao Auditorio Municipal de Ourense o programa de actividades en galego para o público infantil.

O 1º venres de cada mes, en dúas sesións (ás 18h. e ás 19h.) teremos a oportunidade de participar cos máis peques da casa nos espectáculos de teatro, música e danza en galego que se organizan desde o Servizo de Normalización Lingüística do Concello de Ourense. Todas as propostas están pensadas para nenas e nenos de 0 a 6 anos, que entran de balde; as persoas adultas que as/os acompañemos temos que adquirir a nosa entrada en ataquilla.com de maneira anticipada (3€) ou na billeteira antes da función (4€).

Na axenda poderedes ir coñecendo a oferta de actividades programadas. 

Este venres 5 de outubro o espectáculo corre por conta de Pablo Díaz, quen fará unha viaxe a través dos contos coa música como fío condutor,tratando temas e rutinas adaptadas para os máis pequen@s. Para conseguilo,botará man de instrumentos como frautas, guitarra, harmónica, e algúns dos seus temas máis populares.Unha sesión relaxada onde a fantasía e a ilusión serán as protagonistas, e na que grandes e miúdos axudarán a cantar e a entoar as melodías e retrousos.

Pero o Programa Apego é moito máis! 

Se queredes coñecelo un pouco mellor, premede nesta ligazón para acceder a toda a información. 

Hai agasallos para as e os peques e se naceron ou van nacer neste 2018, hai unha caixa de benvida agardando por ela/el.

Xa sodes oíntes de Radio Picariña?

Coñecedes esta iniciativa da CRTVG que leva funcionando desde o pasado mes de xuño?

"Radio Picariña" é unha canle dixital de música infantil e xuvenil a través da cal podemos acceder a unha selección das mil mellores cancións en lingua galega para a rapazada.

O funcionamento é ben sinxelo. Accedendo á canle desde esta ligazón podemos seleccionar os temas, crear a nosa propia listaxe de reprodución e escoitar desde o PC ou desde calquera dispositivo móbil a música escollida.

As cancións están ordenadas de forma alfabética por título. Na información que se mostra está o título da canción, o álbum ao que pertence e os autores da mesma. Doado, non si?

Xa sabedes, se queredes que as vosas pequenas e pequenos escoiten música en galego, que se acheguen á lingua dunha maneira lúdica e que aprendan, aquí tedes un bo recurso do que botar man.

As linguas suman!

Hoxe, 24 de febeiro, celebramos o Día de Rosalía, 181 anos despois do nacemento da autora.

No colexio celebrámolo onte, sumándonos así á iniciativa promovida pola Asociación de Escritoras e Escritores en Lingua Galega (AELG). #AbrideAFiestra

En EP escribiron cartas a Rosalía e fixeron fotos co rostro da escritora simbolizando que "todas e todos somos Rosalía".

En ESO-Bac. saímos á fachada do colexio para escoitar temas musicais baseados nos poemas de Rosalía, ler o manifesto escrito por María Reimóndez para a AELG e ler algúns poemas. Estivemos presentes neste xesto escolar os vogais de Normalización Lingüística de cada aula e o alumnado de "º Bac. B, acompañados por profesorado do EDLG.

Podedes ver fotografías nas redes sociais do colexio, tanto no Facebook como no Twitter.

Desde o EDLG convidámosvos a celebrar este día tamén nas familias con estas recomendacións:

- Para que as nenas e nenos coñezan a obra de Rosalía, podedes botar man da publicación de Galaxia na súa colección Sonárbore (libros-CD): Rosalía pequeniña. 

-  Para as mozas e mozos, recomendamos esta lista de reprodución de YouTube na que poderedes atopar os poemas rosalianos a ritmo de rap, rock...

- Para o público adulto que queira coñecer un pouco máis a fondo a emblemática figura de Rosalía de Castro, recomendamos a biografía escrita por María Xesús Lama, Rosalía de Castro. Cantos de independencia e liberdade (1837-1863), publicado tamén por Galaxia.

Desexamos que todas e todos descubramos en Rosalía un referente de esperanza que nos leve a sentírmonos orgullosos da nosa lingua, a nosa terra, a nosa cultura e traballemos cada día por darlles un futuro de esperanza.

Deixamos aquí un tema de Xardín Desordenado baseado nun escrito de Carlos Casares (autor homenaxeado no Día das Letras Galegas en 2017) dedicado a Rosalía para celebrar este día. 

Feliz Día de Rosalía!

Día de Rosalía

O pasado venres 24 de febreiro celebramos o Día de Rosalía no 180º aniversario do seu nacemento.

No noso cole celebrámolo pintando carautas co rostro da poeta, lendo poemas seus, vendo un vídeo conmemorativo desta celebración, tomando un chocolate e dialogando sobre como potenciar o uso do galego no noso colexio.

Podedes seguir a noticia en imaxes a través dos chíos publicados na conta do colexio en Twitter.

Para seguir celebrando este día cada día deixámosvos uns vídeos. 

O primeiro para os máis pequenos da casa: "Rosalía pequeniña", publicado por Galaxia na súa colección Sonárbore. Disco-libro altamente recomendable para introducir os máis cativos no mundo da poesía. 

O segundo xa para o público máis adulto: "Meniña gaiteira", interpretado por Xardín Desordenado, grupo vigués que nos acompañou o curso pasado nas nosas Xornadas da Lingua.

Desexamos que vos gusten e que sexan unha boa vía de achegamento á obra e o pensamento da nosa poeta máis internacional.

Saúde e lingua!